Bekzod Abdurahmonov va G'ulomjon Abdullaev 1/2 finalda, Jalolovda bronza uchun imkoniyat bor

O'zbekiston erkin kurash terma jamoasining 6 nafar vakili musobaqa medallari hamda muhim reyting ochkolari uchun bahslarga kirishgandi. Ulardan Tokio Olimpiadasi sovrindori Bekzod Abdurahmonov hamda olimpiya o'yinlari ishtirokchisi G'ulomjon Abdullaev yarim final yo'llanmasini qo'lga kiritishdi. 

Vaznini 12 kilogrammga ko'tarib, 86 kg vazn toifasidagi bellashuvlarda ilk bor qatnashayotgan Abdurahmonov nimchorak finalda qozog'istonlik Maksat Satibaldini 9-4, chorak finalda gruziyalik Tarzan Maysuradzeni 8-1 hisobida engdi. Uning yarim finaldagi raqibi turkiyalik Osman Gochen bo'ladi. Bekzod dekabr oyida aynan shu vaznda O'zbekiston chempioni bo'lgan edi. 

SHuningdek, Tokio Olimpiadasining yana bir ishtirokchisi G'ulomjon Abdullaev ham o'zi uchun yangi vaznda yarim finalga etib keldi. Abdullaev turkiyalik Rejep Topalni 7-4, ozarbayjonlik Islam Bazarganovni 3-2, qozog'istonlik Akbar Kurbanovni 7-3 hisobida mag'lubiyatga uchrata oldi. Birozdan so'ng yarim finalda qirg'izistonlik Ulug'bek Joldoshbekovga qarshi gilamga chiqadi. 

Qizig'i, 65 kg vazndagi ikki kurashchimiz Abbos Rahmonov va Umidjon Jalolov 1/8 finaldayoq bir-birlari bilan to'qnash kelishdi. Jalolov ilk kvalifikaciya bahsida ozarbayjonlik Ali Rahimzodadan ustun keldi. Ikki yurtdoshimizning murosasiz kechgan uchrashuvida esa Jalolov Rio Olimpiadasi ishtirokchisi bo'lgan Rahmonovni 9-8 hisobida engdi. Ammo, yarim final ostonasida Umidjon rossiyalik SHamil Mamedovga yutqazib (0-4) qo'ydi. 

Ushbu vazndagi uchinchi vakilimiz Nodir Rahimov esa ilk saralash bosqichida ruminiyalik Nikolay Oxlopkovga imkoniyatni boy berdi. 74 kg vaznda yurtimiz sharafini himoya qilgan Asomiddin Hasanov Pritam Pritam (Hindiston) to'sig'idan o'ta olmadi.