28 mar 20:33
Yangiliklar

Dzyudo

Beloded - 18 yoshida ikki karra jahon chempioni bo'lgan dunyoning eng yosh dzyudochisi! (Sara suratlari+18)

Ukrainalik 19 yoshli dzyudochi Darya Beloded ikki karra jahon chempioni bo'lgan sayyoramizning eng yosh dzyudochisi hisoblanadi.

Beloded o'tgan yili dzyudo vatani - Yaponiyaning Tokio shahrida o'tkazilgan jahon chempionatida ikkinchi bor o'z vaznida dunyoning eng kuchli sportchisi ekanini amalda isbotlagandi. Finalda u yaponiyalik Funa Tanakini vazari bahosi evaziga mag'lub etib, ikki karra jahon chempioniga aylangan va shu bilan bilan birga unvonini himoya qilgandi. Final kuni ukrainalik dzyudochi 18 yoshu 11 oylik edi.

Darya Beloded - 2000 yilning 10 oktyabr kuni Ukrainaning Kiev shahrida dunyoga kelgan. Uning otasi mashhur dzyudochi Gennadiy Bilodid, onasi esa Svetlana Kuznecova. Darya yoshligidan otasi izidan borib, dzyudo bilan professional tarzda shug'ullana boshladi. Aynan ota-onasi uning ilk murabbiylari edi.

Dasha 2015 yilda aytishga arzigulik ilk yutuqlariga erishdi. Avvaliga mamlakat chempioni bo'ldi. Keyin esa Evropa hamda jahon chempionatining oltin medallarini ham qo'lga kiritdi.

Kattalar o'rtasidagi ilk medaliga esa 2017 yilda ega chiqdi. O'sha yilning mart oyida u Praga shahrida o'tgan Qitalararo ochiq kubokda shoxsupaning eng yuqori pog'onasiga ko'tarildi. 2017 yilning 20 aprel kuni Beloded Polsha poytaxti Varshava shahrida Evropa chempioni bo'ldi. -48 kg vaznda tatamiga chiqqan Darya final bellashuvida rossiyalik Irina Dolgovani mag'lubiyatga uchratdi.

2018 yili hali 18 yoshga ham to'lmagan qahramonimiz kattalar o'rtasida jahon chempioni bo'ldi. Beloded ikkinchi davradan bahslarga kirishdi va finalga qadar Distriy Krasniki (Kosovo), Yao Ksiong (Xitoy), Galbadraxin Otgonceceg (Qozog'iston), Paula Pareta (Argentina)dan ustun keldi. Pareta Rio-2016 Olimpiadasi chempioni edi. Uch daqiqa davom etgan final uchrashuvida esa amaldagi jahon chempioni, yaponiyalik Funa Tanakini sof ippon bahosi evaziga mag'lub etdi va 17 yoshida jahon chempioniga aylandi.

Bu bilan Darya Beloded dzyudo tarixidagi ham erkaklar, ham ayollar o'rtasida eng yosh jahon chempioni degan maqoni o'ziniki qilib oldi. O'tgan yili Tokioda o'tgan jahon chempionatida esa u chempionlik unvonini munosib tarzda himoya qildi. Bu safargi finalda ham Funa Tanakini engishga muvaffaq bo'ldi.