Besh nafar dzyudochimiz Osiyo chempionatining 3 ta bronza medali uchun kurashadi

Qita birinchiligida 36 davlatdan jami 272 (166 erkak, 106 ayol) nafar dzyudochi Osiyo chempionati medallari uchun kurash olib boryapti. Musobaqada yurtimiz sharafini 17 (9 erkak, 8 ayol) nafar dzyudochi himoya qilishi haqida xabar bergan edik. 

Afsuski, Osiyo chempionatining ilk kungi saralash bahslari dzyudochilarimiz uchun biroz omadsiz keldi. Aniqrog'i, kechki dasturdagi finallarda O'zbekistondan hech kim oltin medal uchun kurashmaydi. Diyora Keldiyorova o'zining ilk uchrashuvida yaponiyalik raqibasiga yutqazib qo'ydi. Keyin bronza medali uchun o'tish bahsida jamoadoshi Sita Kadambaevani engdi. Endi kechki dasturda koreyalik dzyudochiga qarshi bronza medali uchun tatamiga chiqadi. 

-60 va -66 kg vazn toifasi bronza medallari uchun kechadigan bellashuvlarda o'zbek derbisiga guvoh bo'lamiz. Katta ehtimol bilan bu vaznlarda Olimpiadaga O'zbekiston nomidan kim borishiga oydinlik kiritiladi. Doston Ro'ziev Dilshod Baratovga, Sardor Nurillaev Muhriddin Tilovovga qarshi tatamiga chiqadi.    

Bronza medali uchun kechadigan bellashuvlar:

-52 kg: Diyora Keldiyorova - (Koreya Respublikasi dzyudochisi)

-60 kg: Doston Ro'ziev - Dilshod Baratov 

-66 kg: Sardor Nurillaev - Muhriddin Tilovov 

Qolgan dzyudochilarimiz Halimajon Qurbonova (-48 kg) va SHukurjon Aminova (-57 kg) saralash bahslaridayoq raqibalariga yutqazib, Osiyo chempionatlaridagi ishtiroklarini yakunlashdi.