Bir kunda 4 tennischimizda mag'lubiyat. Ko'p emasmi?

Kecha to'rt nafar tennischimiz turli shaharlarda o'tkazilgan turnirlarda ilk davra uchrashuvini o'tkazishdi va ularning bari birinchi bahsidayoq mag'lubiyat alamini totib ko'rdi. 

Erkaklar o'rtasida mamlakatimizning birinchi raketkasi Humoyun Sultonov Slovakiyaning Trnava shahrida o'tkazilayotgan M25 toifasiga kiruvchi "Fyuchers" turnirida ishtirok etyapti. Yaqinda Osiyo o'yinlarining bronza medalini qo'lga kiritgan Sultonov 1/16 finalda mezbonlar vakili Lukas Pokorniyga 7/6(3), 3/6, 4/6 hisoblarida yutqazib qo'ydi. 

Taqqoslash uchun, Sultonov dunyo reytingida 424, Pokorniy esa 654-pog'onadan joy olgan. Humoyun mukofot jamg'armasi 25 000 dollarni tashkil etgan ushbu musobaqaning oltinchi raqamda saralangan tennischisi edi. 

Ayollar o'rtasida mamlakatimizning birinchi raqamli tennis malikasi Nigina Abduraimova AQSHning CHarlston shahrida o'tkazilayotgan W100 toifasiga kiruvchi turnirda o'z imkoniyatini sinab ko'rdi. Afsuski, hamyurtimiz 1 daqiqasi kam 3 soat davom etgan 1/16 final bahsida amerikalik Makkartni Kesslerga 7/6(3), 6/7(0), 5/7 hisoblaoida imkoniyatni boy berdi. Nigina murosasiz bahsda oxirigacha kurashdi, ammo omad shu kuni mezbon tennischi tomonida bo'ldi.    

Taqqoslash uchun, Nigina Abduarimova WTA reytingida 223, Makkartni Kessler esa 231-o'rinni band etgan. Bu tennischilarning o'zaro ilk uchrashuvi edi. 

Yana ikki tennischimiz - Sergey Fomin va Amir Milushev Turkiyaning Antaliya shahri mezbonlik qilayotgan M15 toifasida kiruvchi turnirda ishtirok etyapti. Ular ham ilk davra uchrashuvidayoq raqiblariga yutqazib qo'yishdi. O'zbekistonning ikkinchi raketkasi hisoblangan Fomin 1/16 finalda turkiyalik Tunjay Duranga 5/7, 6/4, 5/7 hisoblarida mag'lub bo'ldi. Milushev esa rossiyalik Maksim Jukovdan 2/6, 3/6 hisoblarida engildi. 

Taqqoslash uchun, Fomin ATP reytingida 696, uning raqibi Tunjay roppa-rosa 900, Milushev 1931, Jukov esa 1127-pog'onadan joy olgan.