Bobur Qurbonov Nursulton Ro'ziboevni mag'lub etgani haqida gapirdi

O'zbekistonlik aralash yakkakurash ustasi Bobur Qurbonov Olamsport.com saytiga bergan intervyusida UFC'ga o'tishi kutilayotgan Nursulton Ro'ziboev haqida fikr bildirdi.

— Universal jangda Nursulton Ro'ziboev bilan jang qilgan ekansiz?

— O'sha paytda harbiy xizmatda, paxta terimida edim. Deyarli ikki oy paxta yig'im-terimida bo'ldik. Keldim, bir hafta harbiy qismda bo'ldik. Keyin CHirchiqqa musobaqaga olib ketishdi. Birinchi jangda Nursulton bilan to'g'ri kelib qoldim, lekin o'sha paytda Nursultonni tanimas edim. Bilsam, oddiy fuqarolikdagi bola ekan, shu holida harbiylar o'rtasidagi musobaqaga qo'yilgan, mashg'ulot qilib yurgan bola ekan. Nursultonni yutdim, lekin qo'limni jarohatlashdi. Afsuski, o'sha jangdan keyin yarim finalga chiqishim kerak edi, ammo... Nursulton kelib: Aka, sizni hurmat qilaman, sizni taniyman degandi. Hurmati yaxshi ekan. Alloh taqdir qilgan ekan, o'shanda ochkolar hisobiga g'alaba qozonganman.

— Hozir Nursulton Ro'ziboev bilan munosabatingiz qanday?

— Munosabatimiz yaxshi, salom-aligimiz bor. Aytganimdek, kibrga berilmagan, hurmatni joyiga qo'yadigan yigit. Ko'p MMA janglarida birga bo'lganmiz. Irodali bola, bir marta ko'zimni yonida mag'lub bo'lgan edi. O'shanda juda tushkunlikka tushib qolgandi. Men o'sha paytda sportni tashlab ketsa kerak deb o'ylagan edim. Yo'q, mana yana o'zini tiklab oldi. Hozir O'zbekistonda uni kimsan Nursulton Ro'ziboev deb bilishadi.