Bo'kalik sport faxriylariga ehtirom ko'rsatildi

Tuman aholisi orasida o'zining ko'p yillik fidoyi mehnati bilan nom qozongan Jo'ra ota To'raxonov xotirasiga bag'ishlab o'tkazilgan tadbirda tuman hokimligi mutasaddilari, 30 nafar sport faxriylari, 100 nafardan ziyod tuman yoshlari ishtirok etishdi.

Kun avvalida O'zbekiston Milliy Olimpiya qo'mitasi binosining oldida jam bo'lgan faxriylar maxsus avtobusda Bo'ka tumani tomon yo'l olishdi. Qayd etish joiz, safar davomida bo'kalik sport faxriylarining xonadoniga tashrif buyurib, ularning holidan xabar olindi, samimiy suhbat qurildi. 

SHuningdek, tuman aholisi bilan ham uchrashuv o'tkazildi. Unda ko'p yillik hayotiy tajribaga ega bo'lgan faxriylarimiz bugungi davrda yoshlarimiz uchun yaratilgan keng imkoniyat va sharoitlardan unumli foydalanish bo'yicha qimmatli maslahatlarini berishdi. SHuningdek, 30 aprel kuni O'zbekiston Respublikasi Konstituciyasiga kiritilayotgan o'zgarishlar yuzasidan o'tadigan Referendumda faol qatnashib, mamlakatimiz kelajagi uchun befarq bo'lmaslikka chorlashdi.

Xotira turnirida Bo'kaning serg'ayrat yoshlari futbol bo'yicha o'z mahoratlarini namoyish qilishdi. Yakunda g'olib bo'lgan jamoaga esdalik sovg'alari topshirildi.