Buenos-Ayresdagi Olimpiya o'yinlariga yo'llanmalarimiz soni yana bittaga ko'paydi

Musobaqa yakunlariga ko'ra, erkin kurash bahslarida Eron terma jamoasi uchta Olimpiya vaznida oltin medalni qo'lga kiritgandi. Reglamentga ko'ra, mamlakat uchun faqatgina ikkita o'rin ajratiladi. SHu sababli, Eron terma jamoasi yo'llanmalarning biridan voz kechishi lozim edi. Kuni kecha forslar -80kg vazn toifasidagi yo'llanmadan voz kechganliklari malum bo'ldi. Ushbu vazn toifasida o'zbekistonlik yosh polvon Muhammadrasul Rahimov kumush medalni qo'lga kiritgandi. SHu sababli yo'llanma avtomatik ravishda hamyurtimizga beriladigan bo'ldi.

SHu tariqa, kurashchilarimizning yo'llanmalari soni yana bittaga ko'paydi. Buenos-Ayresdagi o'yinlarda erkin kurash bo'yicha Osiyodan Eron va O'zbekiston terma jamoalariga ikkita, Yaponiya terma jamoasidan esa bir nafar sportchi ishtirok etadi. Yunon-rum kurashida esa Eron va Yaponiya ikkitadan, O'zbekiston esa bitta licenziyaga ega. Ayollar kurashida ham ikki sportchimiz Olimpiya o'yinlarida qatnashish huquqini qo'lga kiritgan. Demak, musobaqada umumiy hisobda sport kurashlari bo'yicha besh nafar sportchi O'zbekiston sharafini himoya qiladi.

Qayd etib o'tish lozimki, sport kurashlari bo'yicha Markaziy Osiyo mamlakatlari ichida faqat O'zbekiston Argentinadagi III yozgi o'smirlar Olimpiya o'yinlari yo'llanmasiga ega bo'ldi. Qo'shnilarimizdan xech qaysi mamlakat Buenos-Ayres yo'llanmasini qo'lga kirita olmadi.