Bugun 729 kunlik tanaffusdan so'ng Ufada sport kurashlari bo'yicha jahon chempionati boshlanadi

Yigirma bir yoshgacha bo'lgan kurashchilar o'rtasida tashkil etilayotgan dunyo birinchiligida O'zbekiston terma jamoasining ikki azosi ham gilamga chiqadi. Bizga nomalum sabablar tufayli terma jamoamiz jahon chempionatida to'liq tarkibda qatnasha olmaydi.

Ufa gilamlarida yurtimiz sharafini o'smirlar va yoshlar o'rtasida jahon chempioni, 2018 yil Argentinada o'tgan uchinchi o'smirlar Olimpiadasi g'olibi, "Sport Oskari" mukofoti sohibi Umidjon Jalolov (61 kg) hamda o'smirlar Olimpiadasining bronza medali sohibi Muhammadrasul Rahimov (92 kg) himoya qiladi. Ularning har ikkisi ertangi bellashuvlarda gilamga chiqadi.

729 kunlik tanaffusdan so'ng o'tkazilayotgan yoshlar o'rtasidagi jahon chempionatida dunyoning 53 davlatidan 500 nafardan ziyod kurashchilar 120 ta medallar jamlanmasi uchun baxslarga kirishadilar. Bundan avvalgi jahon chempionati 2019 yili Estoniyaning Tallin shahrida bo'lib o'tgan edi. Pandemik vaziyat sabab o'tgan yili yoshlar o'rtasida jahon chempionati o'tkazilmadi.

Qura natijasiga ko'ra 19 yoshli Umidjon Jalolov o'z ishtirokini to'g'ridan-to'g'ri 1/8 finaldan boshlaydi. Uning raqibi qozog'istonlik Salamat Malikov hamda ozarbayjonlik Abdulfaz Nasirov o'rtasidagi bellashuvdan so'ng malum bo'ladi. 20 yoshli Muhammadrasul Rahimov esa 1/8 finalda AQSH kurashchisi, 19 yoshli Rokki Jozef Elamga qarshi bahs olib boradi.