Bugun Bekzod Abdurahmonov, G'ulomjon Abdullaev va Rustam SHodiev JCH medallari uchun gilamga chiqadi

Kecha jahon chempionatining ilk kuni kurashgan erkin kurashchilarimizdan Javrail SHapiev bronza medali hamda Parij-2024 Olimpiadasi uchun gilamga chiqish imkoniyatini qo'lga kiritdi. -86 kg vazn toifasidagi hamyurtimiz 1/16 finalda polshalik Sebastyan Yezirzanski (4-1), 1/8 finalda turkiyalik Osman Gosen (11-0), 1/4 finalda yaponiyalik Hayato Ishiguroni mag'lubiyatga (15-5) uchratdi. Yarim finalda esa eronlik Hassan Yazdanicharatiga yutqazib qo'ydi (0-10). SHapievning bronza medali uchun bahsdagi raqibi o'tish bosqichidan so'ng aniqlanadi. Javrail g'alaba qozongan taqdirda, bronza medali bilan birga Parij-2024 Olimpiadasi yo'llanmasini ham qo'lga kiritadi.  

Bugun erkin kurash bahslarining ikkinchi kuni olimpiya toifasiga kiruvchi -57 va -74 kg, noolimpiya vazni hisoblangan -79 hamda -92 kg vazn toifalarida saralash bellashuvlari o'tkaziladi. Bugungi bahslarda Tokio Olimpiadasi sovrindori Bekzod Abdurahmonov, olimpiya o'yinlari ishtirokchisi G'ulomjon Abdullaev hamda Rustam SHodievga muxlislik qilamiz. 

Hamyurtlarimizning ilk bosqichdagi raqiblari:

-57 kg: G'ulomjon Abdullaev - Gayan Ekanayake (SHri-Lanka) 

-74 kg: Bekzod Abdurahmonov - Kamil Rimitski (Polsha) 

-92 kg: Rustam SHodiev - Mixal Beilavski (Polsha)