Bugun O'zbekiston dzyudo federaciyasida "Ochiq eshiklar kuni" o'tkaziladi

Mustaqil O'zbekiston sport delegaciyasiga Olimpiadadagi ilk medalni ham aynan dzyudochimiz taqdim etgan. 1996 yilgi Atlanta Olimpiadasida ishtirok etgan Armen Bagdasarov kumush medal sohibiga aylangan edi. 

SHundan so'ng o'tgan davr mobaynida to'rt yillikning eng nufuzli musobaqasida Rishod Sobirov (3 ta bronza), Abdulla Tangriev (kumush), Diyorbek O'rozboev (bronza) ham Olimpiada shoxsupasiga ko'tarildi. Hozirda terma jamoamiz azolari dzyudo vatani - Tokioda o'tkaziladigan Olimpiya o'yinlari yo'lidagi muhim reyting musobaqalariga tayyorgarlik ko'rishyapti. Ularni nomma-nom aytmasak ham bundan yaxshi xabardorsiz. 

Afsonaviy dzyudochi, Olimpiada chempioni, uch karra jahon chempioni Ilias Iliadis bosh murabbiyligidagi yulduzli tarkib dzyudochilarimiz bugun, 22 dekabr kuni o'tkaziladigan "Ochiq eshiklar kuni"da hozir bo'lishadi va tadbirga keladigan siz azizlarga o'z mahoratlarini namoyish etishadi. Dzyudochilarimizdan tashqari ayni paytda Toshkentda mashg'ulot o'tkazayotgan Gruziya terma jamoasining yulduzli tarkibi ham "Ochiq eshiklar kuni"da ishtirok etadi. 

Bugun soat 10:00da O'zbekiston dzyudo federaciyasida boshlanadigan marosimning qiziqarli o'tishiga kafolat beramiz. Sizlarni ajoyib sovg'alar kutmoqda! 

Tadbir davomida dzyudochilarimizning mashg'ulotlarini kuzatish, ular bilan muloqot qilish hamda suratga tushish imkoniyatiga ega bo'lasiz. 

"Ochiq eshiklar kuni"ga barcha muxlislar hamda ommaviy axborot vositalari xodimlarini taklif etamiz.