Bugun O'zbekistonning eng sovrindor sportchisi Rishod Sobirov tavallud topgan kun!

Rishod Rashidovich Sobirov 1986 yilning 11 sentyabrida Buxoro viloyatining Jondor tumani, Burbog'i qishlog'ida tug'ilgan. Dzyudo bilan 11 yoshida Rustam To'raev qo'l ostida shug'ullanishni boshlagan. Xalqaro musobaqalarga Furqat Soliev va Boris Grigorev kabi murabbiylar qo'l ostida tayyorgarlik ko'rgan hamda ishtirok etgan.

Rishod ilk xalqaro miqyosdagi sovrinini 2006 yilda qo'lga kiritgan. O'shanda qahramonimiz Xitoy Taypeyida bo'lib o'tgan yoshar o'rtasidagi Osiyo chempionatida birinchi o'rinni egallagandi. Oradan bir yil o'tib esa u kattalar o'rtasidagi Osiyo chempionatida finalgacha etib borgan va ikkinchi o'rin egasiga aylangan.

2008 yilda O'zbekiston chempioniga aylangan sportchi mamlakat terma jamoasi tarkibidan ham joy oladi va Olimpiadaga yo'llanmani qo'lga kiritadi. Pekinda bo'lib o'tgan Olimpiya o'yinlarida 60 kg gacha bo'lgan vazn toifasida u bronza medali sohibiga aylangan.

2010 yilda esa Rishod Sobirov Tokioda bo'lib o'tgan jahon chempionatida g'oliblikni qo'lga kiritadi. Oradan bir yil o'tib, Parijda ushbu muvaffaqiyatini yana takrorlaydi.

2012 yili Londonda bo'lib o'tgan Olimpiadada dzyudochi yarim finalgacha etib borgan. Biroq, yakunda yana bronza medali bilan kifoyalanishga majbur bo'lgan.

2016 yili Braziliyada bo'lib o'tgan Rio Olimpiadasida sportchi yana bronza medalini qo'lga kiritgan va uchta olimpiadada medal qo'lga kiritgan kam sonli dzyudochilardan biriga aylanib oladi.

Professional sportdagi faoliyatini yakunlaganidan so'ng Toshkentda Rishod Sobirovning dzyudo maktabi ochildi. "Dinamo" sport majmuasida faoliyat yuritayotgan dzyudo maktabida yangi Rishod Sobirovlar kamol topmoqda. 

Fursatdan foydalanib, Rishod Sobirovni bugungi unutilmas kun munosabati bilan chin qalbdan muborakbod etamiz.  

Sovrinlari:

Olimpiada: 3 ta bronza

Jahon chempionati: 2 ta oltin, 1 ta bronza

Jahon kubogi/Gran-Pri/Katta Dubulg'a: 10 ta oltin, 4 ta kumush, 1 ta bronza

Osiyo chempionati: 1 ta oltin, 1 ta kumush, 2 ta bronza

Yoshlar o'rtasidagi Osiyo chempionati: 1 ta oltin

Buxoro davlat universitetini tamomlagan.

Harbiy xizmatchi

Mukofotlari:

Xalqaro toifadagi sport ustasi (2003)

"O'zbekiston Respublikasida xizmat ko'rsatgan sportchi" fahriy unvoni (2008)

"O'zbekiston Respublikasi Mustaqilligiga 20 yil" esdalik nishoni sohibi (2011)

"O'zbekiston iftihori" fahriy unvoni sohibi (2012)

"El-yurt hurmati" ordeni sohibi (2016)