Bugun Tbilisi "Katta Dubulg'a"da og'ir vaznli dzyudochilarimizga muxlislik qilamiz, ular orasida Davlat Bobonov ham bor!

Mukofot jamg'armasi 154 000 evroni tashkil etuvchi ushbu nufuzli musobaqada O'zbekiston terma jamoasi vakillari ham medallar hamda Parij-2024 Olimpiadasi yo'lidagi qimmatli reyting ochkolari uchun bahs olib borishyapti. 

Ikki kunlik bellashuvlar yakuniga ko'ra terma jamoamiz 2 ta kumush medal bilan 83 davlat orasida umumjamoa hisobida 7-o'rinni egallab turibdi. Musobaqaning birinchi kuni Sardor Nurillaev (-66 kg), kecha esa SHarofiddin Boltaboev (-81 kg) terma jamoamizga kumush medalni taqdim etgandi. 

Bugun erkaklar -90, -100, +100 kg, ayollar esa -78 va +78 kg vazn toifalarida tatamiga chiqishadi. Bugun og'ir vazn toifasida o'tkaziladigan bellashuvlarda 7 nafar dzyudochimizga muxlislik qilamiz. Ular orasida jahon chempioni, Tokio-2020 Olimpiadasining bronza medali sovrindori Davlat Bobonov ham bor.  

Bugun tatamiga chiqadigan dzyudochilarimiz:

-78 kg: Irisxon Qurbonboeva - Natali Pauell (Buyuk Britaniya)

+78 kg: Rinata Ilmatova - Akmarjan Turdajieva (Qirg'iz Respublikasi)

-90 kg: Davlat Bobonov - Robert Florentino (Dominikan Respublikasi)

-100 kg: Ernazar Sarsenbaev - Mantas Klimasauskas (Litva)

-100 kg: Rustam SHorahmatov - Leonardo Gonsalvesh (Braziliya) 

+100 kg: O'tkirbek To'raboev - Anto Dubreta (CHernogoriya)

+100 kg: SHohruhxon Baxtiyorov - Jamal Gamzatxanov (Ozarbayjon)