Bugun uch nafar, ertaga esa yana bir tennischimiz kortga chiqadi

Unga ko'ra, birinchi bo'lib Maksim SHin (ATP - 1107) Turkiyaning Antalya shahrida davom etayotgan M 15 musobaqasi 1/16 finali doirasida germaniyalik Pol Vorner (ATP - 907)ga qarshi kortga chiqadi. Mazkur uchrashuv Toshkent vaqti bilan 14:00 da boshlanadi va g'olib nimchorak final bahsida musobaqaning ikkinchi raqamli tennischisi, xorvatiyalik Due Aydukovich (ATP - 391)ga qarshi bahs olib boradi.

Yana bir tennis ustamiz — Sanjar Fayziev (ATP - 1180) esa Portugaliyada davom etayotgan CHellenjer musobaqasining juftlik bahslari nimchorak finali doirasida kortga chiqadi. Rossiyalik Evgeniy Karlovskiy (ATP - 314) bilan birgalikda sovrin uchun kurashayotgan hamyurtimizga bu bosqichda Jonatan Eyserik (ATP - 850) hamda Denis Molchanov juftligi raqiblik qiladi. Uchrashuv Toshkent vaqti bilan 15:00 da boshlanishi rejalashtirilgan.

SHuningdek, bugungi kun doirasida Qatardagi M 15 musobaqasi juftlik bahslarida ishtirok etayotgan Humoyun Sultonov (ATP - 490)/Parikshit Somani juftligi ham kortga chiqishi kutilmoqda. Ularga nimchorak final doirasida Vivek Kolluru/Kris Kravsevic raqiblik qiladi. Uchrashuv bizning vaqti bilan 20:30 da start oladi.

11 yanvar tongida esa Australian Open'da ishtirok etayotgan yagona o'zbekistonlik — Nigina Abdurimova (WTA - 176) saralash bosqichi yarim finalida kortga chiqadi. Amerikalik Keti Volneyc (WTA - 115)ga qarshi kechishi kutilayotgan uchrashuv Toshkent vaqti bilan 09:30 dan so'ng boshlanadi.