Bungacha qaysi mamlakatlarda Prezidentlar MOQ rahbari bo'lgan?

Bu voqea olamshumul yangilik sifatida keng tarqalishi bilan bir qatorda, ko'plab savollarni ham keltirib chiqardi. Davlat rahbari MOQni boshqarishga haqlimi? XOQ buning uchun O'zbekiston tomoniga nisbatan qandaydir chora ko'rmaydimi va h.k. 

SHuni aytish kerakki, davlat rahbarining o'z davlatida Milliy Olimpiya qo'mitasini boshqarishi yangilik emas. Ayni paytda Ozarbayjon Prezidenti Ilhom Aliev o'z mamlakatining Milliy Olimpiya qo'mitasiga rahbarlik qiladi. To'g'ri, Ilhom Haydarovich bu lavozimga hali Prezident bo'lmagan paytida saylangan va shundan beri uzluksiz Ozarbayjon MOQni boshqarib keladi. Bundan tashqari, Tojikiston Prezidenti Imomali Rahmon ham Olimpiya qo'mitasi raisi sanaladi. O'z vaqtida Belarus Prezidenti Aleksandr Lukashenko, yon qo'shnimiz Turkmaniston rahbarlari - Saparmurod Niyozov va Gurbanguli Berdimuhamedovlar ham shunday lavozimga loyiq ko'rilishgan. 

"Bunday holat faqat sobiq SSSR Respublikalarida bo'lganmi?" desangiz "yo'q" deb javob beraman. SHarq va g'arb davlatlarida ham bu kabi holatlar uchrab turadi. Masalan, Indoneziyaning ilk Prezidenti Sukarno, Monako qiroli Albert II va boshqalar ham o'z mamlakatida Olimpiya qo'mitasiga rahbarlik qilishgan. Bu ro'yxatga yana Kubaning sobiq rahbari Fidel Kastroni ham qo'shsak bo'ladi. Garchi don Kastro rasman Olimpiya qo'mitasi raisi bo'lib ishlamagan bo'lsada, amalda Kuba MOQni boshqargan. 

Xullas, O'zbekiston Respublikasi Prezidenti SHavkat Mirziyoevning mamlakat Milliy Olimpiya qo'mitasiga rais etib saylanishida hech qanday qoidalar buzilishi holatlari yo'q va bu o'zgarish faqat o'zbek sporti rivojiga xizmat qilishiga ishonaman.

Otabek Eshmamatov