Butunjahon armiya o'yinlari. Bekmurod Oltiboev vice-chempion!

Hozirgina armiya o'yinlarining dzyudo musobaqasi +100 kg vazn toifasi bahslarida final bellashuvi yakunlandi. Oltin medal uchun kechgan uchrashuvda hamyurtimiz Bekmurod Oltiboev rossiyalik Inal Tacoevga qarshi tatamiga chiqdi. Kuchli raqibga qarshi bahsda Bekmurod mag'lubiyatga uchradi va musobaqaning kumush medalini qo'lga kiritdi.  

Taqqoslaydigan bo'lsak, Oltiboev dunyo reytingida 14, Tacoev esa 7-o'rinni egallab turibdi. Rossiyalik dzyudochi olimpiya reytingining 12-pog'onasidan joy olgan. Finalda tajriba va omad o'z so'zini aytdi.

Malumot uchun, Bekmurod Oltiboev finalga qadar mo'g'ulistonlik Hutag Tsogtgerel, rossiyalik Anton Brachev, iordaniyalik Muhammad Alfrux, Dominikan Respublikasi vakili Xose Manuel Nova Alkantarani mag'lubiyatga uchratgan edi.  

Eslatib o'tamiz, bu O'zbekiston dzyudo terma jamoasining Butunjahon Armiya o'yinlaridagi oltinchi medali bo'ldi. Bugun Gulnoza Matniyazova bronza medaliga ega chiqqan edi. Kecha esa -66 kg vazn toifasida Artyom SHturbabin oltin, shu vaznda bellashgan Muhriddin Tilovov kumush, -73 kg vaznda yurtimiz sharafini himoya qilgan Hikmatulloh To'raev oltin, -52 kg vaznda tatamiga chiqqan vakilamiz, yoshlar o'rtasida jahon, kattalar orasida Osiyo chempioni Diyora Keldiyorova bronza medalini qo'lga kiritgan edi. 

SHu tariqa, Butunjahon armiya o'yinlarining dzyudo musobaqasi ikkinchi kungi bahslaridan so'ng terma jamoamiz 2 ta oltin, 2 ta kumush va 2 ta bronza medaliga ega bo'ldi. Hozircha aynan dzyudochilarimiz O'zbekiston sport delegaciyasiga jami 6 ta medalni taqdim etishdi. Dzyudo musobaqasida umumjamoa hisobida Xitoy va Rossiyadan so'ng uchinchi o'rinni egallab turibmiz. Mezbonlar tarkibida 4, Rossiyada 3 ta oltin medal bor.