"Buyuk Ipak yo'li-2024". Bahodir Jalolov - Kamshibek Kunkabaev jangini ko'rmaymiz

Ananaviy tarzda o'tkazib kelinayotgan "Buyuk Ipak yo'li" musobaqasida o'nga yaqin davlat bokschilari qatorida O'zbekiston terma jamoasi ham to'liq tarkibda medallar uchun ringga chiqmoqda. Ular orasida jahon va Olimpiada chempioni Bahodir Jalolovning ham borligi haqida xabar bergan edik. 

Bugun charm qo'lqop ustamiz turnirdagi ilk jangini eronlik Ruzbeh Safariga qarshi o'tkazdi. Uch raund to'liq davom etgan jang yakunida Jalolov hakamlarning yakdil qarori bilan g'alaba (5:0) qozondi va 1/2 finalga yo'l oldi. 

Afsuski, yarim finalda Jalolov - Kunkabaev klassik to'qnashuvni ko'rmaymiz. Boisi, Kamshibek +92 vazn toifasi doirasidagi 1/4 final jangida rossiyalik Ramazan Karnukaevga hakamlarning ayri qarori bilan imkoniyatni boy berib qo'ydi. Jalolov va Kunkabaev so'nggi bor o'tgan yili Osiyo o'yinlarining finalida o'zaro to'qnash kelishgan va o'shanda charm Big Uzbek 5:0 hisobida zafar quchgandi.