CHendu-2021, Taekvondo. Ayollar terma jamoamiz sensaciya qayd etgan holda Koreyani mag'lub etib, musobaqa finaliga yo'l oldi!

Reglamentga ko'ra, bugungi kun doirasida jamoaviy bahslar o'tkaziladi.

Unda O'zbekiston erkaklar hamda ayollar terma jamoalari ham ishtirok etishdi. Unga ko'ra, erkaklar terma jamoamiz ilk bosqichda Koreya termasi vakillariga imkoniyatni boy berib, musobaqani tark etdi.

Ayollar terma jamoamiz esa o'z ishtirokini AQSH termasiga qarshi bahsdan boshladi. Birinchi bellashuvda mutlaqo qiyinchiliksiz g'alaba qozongan vakilalarimiz chorak final bellashuvida Xitoy Taypeyi termasini musobaqadan chiqarib yubordi. Yarim final bellashuvida esa termamizga musobaqa favoritlaridan biri Koreya termasi qizlari raqiblik qildi. Quvonarlisi, hamyuyurtlarimiz bu bahsda ham mardonavor kurashib, 34:33 hisobida g'alaba qozondi va finalga yo'l oldi.

Endilikda oltin medal yo'lida qizlarimizga mezbonlar - Xitoy terma jamoasi raqiblik qiladi. Bahs Toshkent vaqti bilan 15:00 da boshlanadi. Bellashuvni fisu.tv sayti yoki mobil dasturi orqali tomosha qilishingiz mumkin.