CHiroqchidagi  1-BO'SMda shaxmatchilarni taqdirlash marosimi o'tkazildi

Yaratilgan shart-sharoitlardan unumli foydalangan BO'SM tarbiyalanuvchilari o'tkazilayotgan viloyat, respublika va xalqaro musobaqalarda kuchli uchlikdan joy olishga muvaffaq bo'lishmoqda. Yaqinda Toshkent shahrida 14 yoshdan 18 yoshgacha bo'lgan o'smirlar va qizlar o'rtasida shaxmat bo'yicha o'tkazilgan O'zbekiston chempionatida  BO'SM tarbiyalanuvchilari ham munosib  ishtirok etib, medallarga ega chiqishdi. BO'SM shaxmat murabbiyi Abdikamol Ergashev shogirdlaridan Holida Nomozova 18 yoshgacha qizlar o'rtasidagi bellashuvda 9 imkoniyatdan 7 ochko to'plab, O'zbekiston chempioni, degan nomga sazovor bo'ldi. Yanayam quvonarlisi H. Nomozova ushbu natijasi bilan oliy o'quv yurtiga imtiyozli o'qishga kirish  xuquqini ham qo'lga kiritgan bo'lsa, 14 yoshgacha o'g'il bolalar bahsida  Davron SHaripov ham 9 imkoniyatdan 8 ochko to'plab, oltin medal sohibiga aylandi. SHuningdek, 16 yoshgacha bo'lgan qizlar o'rtasida dona surgan Durdona Javlieva hamda 14 yoshgacha qizlar musobaqasida qatnashgan Surayyo Xushmurodova ham kuchli sakkizlikda etirof etildi. Ushbu qo'lga kiritilgan munosib natijalar bois, BO'SMda shaxmatchilar va ularning murabbiyini taqdirlash marosimi o'tkazildi. BO'SM mamuriyati tomonidan diplom va esdalik sovg'alari topshirildi.

Ilhom RAHMONOV