Cicipas Barselonani zabt etish uchun uchinchi bor urinib ko'radi

Greciyalik tennischi 1/2 final uchrashuvida ATP reytingining 20-pog'onasida borayotgan italiyalik Lorenco Muzettini uch set natijasiga ko'ra mag'lubiyatga uchratdi - 6/4, 5/7, 6/3.

Ikki soatu 29 daqiqa cho'zilgan bahsda Cicipas 5 ta eys, 4 ta qo'shxato va 6 ta breyk qayd etdi. Tennischilarning o'zaro uchrashuvlaridagi hisob yanada yiriklashdi - 4:0. 

Bugun Stefanos bosh sovrin uchun ispaniyalik Karlos Alkarazga qarshi kortga chiqadi. Bu Cicipasning Barselonani zabt etish yo'lidagi uchinchi urinishi bo'ladi. Bundan avvalgi finallarda u 2018 va 2021 yillarda Rafael Nadalga imkoniyatni boy bergan edi.