Cindao “Masters” turniri startiga 3 kun qoldi!

12-14 dekabr kunlari Xitoyning Cindao shahrida o'tkaziladigan “Masters” seriyasiga kiruvchi ushbu turnirda 5 ta qitaning 68 mamlakatidan jami 454 (236 erkak va 218 ayol) nafar dzyudochi musobaqa medallari hamda Tokio-2020 Olimpiadasi yo'lidagi muhim reyting ochkolari uchun bahslarga kirishishadi. 11 dekabr kuni turnirga qura tashlash hamda ishtirokchilarni tarozidan o'tkazish marosimlari bo'lib o'tadi. 

Etiborga molik jihati shundaki, yilning so'nggi nufuzli musobaqasi g'oliblari 1800 reyting ochkosini o'z hisoblariga yozib qo'yishadi. Bu Jahon chempionatidan keyingi eng katta musobaqa hisoblanadi. Taqqoslash uchun, shu yil Yaponiyada o'tgan jahon chempionati g'oliblari 2000 reyting ochkosini qo'lga kiritishgan edi. 

So'nggi malumotga tayanadigan bo'lsak, “Masters” turnirida eng ko'p ishtirokchi Evropadan bo'lib, Qo'hna qitaning 35 davlatidan jami 265 nafar dzyudochi Xitoyga keladi. Osiyoning 13 mamlakatidan 124 sportchi musobaqada qatnashish istagini bildirgan. Ular orasida O'zbekiston terma jamoasining 11 nafar dzyudochisi ham bor.   

O'rinlar uchun kafolatlangan reyting ochkolar:

CHempion – 1800 ball

2-o'rin – 1260 

3-o'rin – 900 

5-o'rin – 648 

7-o'rin – 468   

Ishtirok uchun – 200