Dana White’s Contender Series 5-hafta natijalari: Dana Uayt yangi Jon Jonsni topdi

Tashkilot ro'yxatidan amerikalik yarim og'ir vaznli Kventin Pesli, slovakiyalik o'rta vaznli Martin Kozak va amerikalik yarim engil vaznli Kristian Natividad joy olishdi. Ular muddatidan oldin g'alaba qozonishga muvaffaq bo'lishdi. Birinchi raunddayoq nokaut bilan g'alaba qozongan Kventin Peslini liga rahbari Dana Uayt Jon Jonsga qiyosladi.

"Men yigitlardan so'radim: "Nega rekordi 3-0 bo'lgan yigit bugun asosiy jangda ishtirok etyapti?" Ular menga qarab: "Tez orada bilib olasan", deyishdi. 4-0 rekordi va 24 yosh – UFC`ga o'tish uchun tajriba kamlik qiladi, ammo jangdan so'ng ko'pchilik, jumladan men ham Jon Jons haqida gapira boshladik. Sen ko'pchilikka Jon Jonsni eslatding. Sen juda tomoshabop yigitsan va biz hammamiz sening navbatdagi jangingni intiqlik bilan kutamiz", – dedi Uayt jangchiga shartnomani topshirar ekan.

SHuningdek, hakamlarning yakdil qarori bilan g'alaba qozongan amerikalik yarim o'rta vaznli Isaak Moreno ham UFC bilan shartnoma imzoladi. Biroq braziliyalik yarim engil vaznli Apollon Gomesning ochkolar evaziga qozongan g'alabasi tashkilot rahbarini unchalik hayratlantirmadi.

"Apollon, menga bu jang yoqdi. O'ylaymanki, ikkalangiz ham ajoyib jang qildingiz. Ammo sen meni "bu yigitni albatta olishim kerak" deb o'ylashga majbur qiladigan hech narsa qilmading. Hali yoshsan, tajriba to'plashing mumkin. Bugun sening oqshoming emas, birodar", – dedi Uayt tadbir yakunida.

Turnirning barcha natijalari:

Kventin Pesli Arlind Berishani nokaut bilan mag'lub etdi (tirsaklar bilan zarbalar) – 1-raund, 4:41

Isaak Moreno Rejinaldo Jeraldo Juniorni hakamlarning yakdil qarori bilan engdi (29-28, 29-28, 29-28)

Martin Kozak Kristian Ekolsni texnik nokaut bilan taslim etdi (zarbalar) – 2-raund, 1:32

Apollon Gomes Von Il Kvonni hakamlarning yakdil qarori bilan yutdi (29-28, 29-28, 29-28)

Kristian Natividad Kolton Laudni nokaut bilan mag'lubiyatga uchratdi (tanaga berilgan zarba) – 1-raund, 1:10