Daniel Dyubua - Entoni Joshua jangi statistikasi taqdim etildi + FOTO

Oqshomning markaziy jangi superog'ir vazn toifasida vaqtinchalik IBF chempionlik kamari sohibi Daniel Dyubua hamda IBF, WBA, WBO va IBO yo'nalishlarida sobiq jahon chempioni Entoni Joshua o'rtasida bo'lib o'tdi. 

Britaniyalik bokschilar o'rtasidagi 12 raundga mo'ljallangan jang 5-raundda yakunlandi. Dyubua nomdor raqibini nokautga uchratib, to'laqonli IBF chempioniga aylandi. Ushbu kamarni ukrainalik Aleksandr Usik bir muddat avval vakant, yani egasiz qoldirgan edi.  

CompuBox taqdim etgan statistikaga ko'ra, Dyubua barcha jabhalarda vatandoshidan ustunlikka erishgan. U uch marotaba Joshuani nokdaun holatiga tushirib qo'ydi. 26 yoshli Daniel Dyubua professional boksdagi debyutini 2017 yilda o'tkazgandi. 2022 yilning iyun oyida amerikalik Trevor Brayanni nokautga uchratib, WBA Regular kamarini qo'lga kiritgan. SHu yil iyunda esa u xorvatiyalik Filip Xrgovichga ilk mag'lubiyatni taqdim etib, vaqtinchalik IBF chempioniga aylangandi.