Daniil Eybog joriy mavsum nima uchun xalqaro musobaqalarda ishtirok etmayotganini ochiqladi

Malum bo'lishicha, bunga moliyaviy qiyinchiliklar sabab bo'lmoqda.

"Ko'pchilikning savoliga — bu mavsumda Jahon turida nega qatnashmayotganimga javob bermoqchiman. Buning sababi — O'zbekiston tomonidan moliyalashtirish borasida hozirda yuzaga kelgan qiyinchiliklar. SHu bois ayni paytda musobaqalarda ishtirok eta olmayapman. Umid qilamanki, bu masala tez orada hal bo'ladi.

Musobaqalarni o'tkazib yuborish alam qiladi. Ammo bir muhim jihatni alohida takidlamoqchiman.

So'nggi besh yil davomida mutlaqo mustaqil shug'ullanyapman: jamoasiz, yordamchi xodimlarsiz va shaxsiy murabbiysiz. Faqat o'z bilimim, tajribam va xatolarimga tayanganman.

SHunga qaramay, Olimpiadaga yo'llanma oldim, 500 metrlik masofada 40 soniyalik chegaradan o'tdim — natijam 39.930 soniya bo'ldi — va dunyoning eng kuchli sprinterlari qatoriga kirdim. Jahon musobaqalari tarixidagi eng tez aylanalardan birini qayd etgan sportchilar safidan joy olganimdan xursandman.

Ochig'ini aytsam, deyarli yakka holda shunday sprint darajasiga erishgan va Olimpiya o'yinlarida murabbiysiz, jamoasiz qatnashgan boshqa bironta Olimpiada ishtirokchisini bilmayman.

Hozir ham o'z kuchim bilan mashg'ulot o'tkazyapman va sportdagi faoliyatimni yakunlaganim yo'q. Yangi usullarni o'rganib, o'sishda davom etishga harakat qilyapman. Xalqaro turga qaytishni intiqlik bilan kutyapman. Umid qilamanki, tez orada ko'rishamiz!", deb yozgan Eybog.

Eslatib o'tamiz, u yil boshida Italiyaning Milan va Kortina shaharlari mezbonlik qilgan qishki Olimpiya o'yinlarida yurtimiz sharafini himoya qilgan edi.