Davlat Bobonov: "Eng katta yutug'imiz - avlodlar almashinuvi"

Dzyudochimiz qisqa intervyusi davomida avlodlar almashinuvi, O'rozboevning dopingi va Parij Olimpiadasiga tayyorgarlik haqida gapirib o'tdi.

- Hozirgi o'zbek dzyudosidagi eng katta yutuq deb aynan qaysi jihatni ko'rsata olasiz?

- 2021 yildagi eng katta yutug'imiz menimcha, bu terma jamoada avlodlar almashinuvi bo'lganidir. CHunki Rishod Sobirov, Abdulla Tangrievlar avlodidan so'ng bunday tarkib hozirgacha chiqmagan edi.

- Diyorbek O'rozboevda aniqlangan doping, o'zi umuman sportchilarda aniqlanyotgan doping yoki boshqacha qilib aytganda, sportda dopingga qanday munosabat bildirasiz?

- Menimcha, doping bu sportchi o'zini ko'rsatishi uchun to'sqinlik. Qolaversa, sportchi xalq mehrini qozonishi uchun ham asosiy to'sqinlik qiluvchi vosita hisoblanadi.

- Bilamizki, deyarli har bir Olimpiadada dzyudo sport turidan kamida bitta medal qo'lga kiritamiz. Parij olimpiadasida ham muxlislar sizlardan yuqori natijalar kutishi tabiiy. Navbatdagi Olimpiada uchun tayyorgarliklar qay darajada, Parij 2024 uchun tayyorgarlik boshlandimi?

- Parijda bo'lishi kutilayotgan Olimpiada uchun tayyorgarlik avjida, qaysidir manoda o'yinlar uchun tayyorgarlik  hozirdan boshlangan desak ham bo'ladi. Yozdagi Olimpiadadan so'ng jahon chempionatida ham muvaffaqiyatli ishtirok etdik. Yanvarda ham bir qator musobaqalar bo'lib o'tishi rejalashtirilgan, bunda ham nasib qilsa muvaffaqiyatli qatnashamiz. Bundan tashqari, yaqinda besh-olti jamoa ichidan PSJni tanlagan holda ushbu klub safiga o'tdim.

- Davlat Bobonov dzyudodagi faoliyatini yakunlaganidan so'ng sir bo'lmasa, aynan qaysi sohada faoliyat yuritishi mumkin? Aytmoqchimanki, Rishod Sobirov o'z faoliyatini yakunlaganidan keyin ham dzyudodan uzoqlashgani yo'q. Sizda bu borada rejalar qanday?

- To'g'risini aytsam, bu haqida hali o'ylab ko'rmabman (kuladi).

- Davlat aka kelgusi musobaqalarda, ishlarda omad, javoblaringiz uchun rahmat.

- Sizga ham rahmat, faoliyatingizda omad.