Diyora Keldiyorovaning kimonosi, bokschilarning qo'lqopi aukcionda sotildi

Qiziq tomoni shundaki, “O'zekspomarkaz”da o'tkazilayotgan qishloq xo'jaligi ko'rgazmasi doirasidagi ushbu xayriya kimoshdi savdosida 10 bosh uzum 30 mln, Olimpiada qahramonlari – Diyora Keldiyorovaning kimonosi 6 mln, bokschilarning qo'lqopi esa 26 mln so'mga sotildi.

Boks bo'yicha Olimpiada chempionlarimizning imzosi tushirilgan qo'lqopning bahosi 26 mln so'mgacha chiqdi va "Omonboy Farmonov" fermer xo'jaligi rahbari, samarqandlik Jo'rabek Farmonov tomonidan xarid qilindi. U va oxirigacha kurashgan fermer ayol Bahodir Jalolov bilan tushlik qilish huquqini ham qo'lga kiritishdi.

G'olib bemor bolalar qo'llab-quvvatlanayotganidan xursandligini bildirgan va kimononi yanagi savdolarga qo'yish uchun “Sen kuchlisan” jamoasiga qayta hadya qilgan. Xayriya aukcioni ertaga ham o'z ishini davom ettiradi.

Tashkilotchilarning aytishicha, tushgan pullar oqqon va onkologik kasalliklarga chalingan bolalarni qo'llab-quvvatlashga sarflanadi.