Dog'istonliklar mashg'ulotlarga qaytishdi

Avgust oyining ilk kunlari dog'istonlik erkin kurashchilar ikki haftalik o'quv-mashg'ulot yig'inini o'tkazish uchun Xushtad Cumadinsk tumaniga qarashli tog'li hududda joylashgan  bazaga jo'nab ketishadi. Terma jamoa to'rt oylik tanaffusdan so'ng ilk bor to'liq tarkibda yig'ilmoqda. Yig'inga jami 43 kurashchi taklif etilgan bo'lib, ularning 25 nafari Rossiya terma jamoasi azolari hisoblanadi. Ular shu kunlarda Moskva shahrida chuqurlashtirilgan tibbiy ko'rikdan o'tishyapti. 

"Biz hali bunday balandlikda mashg'ulot o'tkazmagan edik. Hozir boradigan joyimiz dengiz sathidan 1800 metr balandlikda joylashgan. Tog'ning musaffo havosi hamda ajoyib tog' manzarasidan bahramand bo'lish va shu bilan birga mashg'ulot o'tkazish har bir kurashchi uchun yoqimli xislarni taqdim etadi. Ushbu bosqichda asosiy etibor umumiy jismoniy tayyorgarlikka qaratiladi. Afsuski, bazada sport zali va stadion yo'q. Bor imkoniyatdan kelib chiqib mashg'ulotlarni tashkil qilamiz. Agvalining markazigacha 10 kilometr masofa bor. O'sha erda sparring mashg'ulotlarni o'tkazamiz", - dedi terma jamoa katta murabbiyi Gadji Rashidov.

Malumot uchun, 18-20 sentyabr kunlari Moskva shahrida Rossiya chempionatining o'tkazilishi rejalashtirilgan. Aslida mamlakat chempionati aprel oyida Ulan-Udeda o'tkazilishi kerak edi. Lekin koronavirus pandemiyasi sabab musobaqa bekor qilingandi. Buryatiya poytaxti Rossiya chempionati mezboni sifatida qolaveradi, faqat bu musobaqa kelasi yilda o'tkaziladi.