Dyusseldorf "Katta Dubulg'a". Birinchi kungi ishtirokimiz qanday bo'ldi?

Yilning hisob bo'yicha ikkinchi "Katta Dubulg'a" musobaqasida sayyoramizning 5 qitasi 120  davlatidan jami 718 (427 erkak, 291 ayol) dzyudochi, ular qatorida 15 nafar o'zbekistonlik polvonlar ham turnir medallari hamda Tokio-2020 Olimpiadasi yo'lidagi muhim reyting ochkolari uchun tatamiga chiqishyapti. 

Kecha Dyusseldorf tatamilarida ayollar 3, erkaklar esa 2 ta vazn toifasida bahslarga kirishishdi. Hamyurtlarimizdan esa 5 nafari o'z mahoratini namoyish etdi. Kechagi kun doirasidagi eng yaxshi natijamiz 7-o'rin bo'ldi. Jahon chempionatining kumush medali sovrindori SHarofiddin Lutfullaev (-60 kg) chorak finalga qadar etib bordi. Ishtirokini to'g'ridan-to'g'ri ikkinchi davradan boshlagan Lutfullaev gruziyalik Jaba Papinashvili, tunislik Fraj Doubini mag'lub etdi. CHorak finalda niderlandiyalik Tornike Cakadoeaga yutqazib qo'ydi. Bronza medali yo'lidagi o'tish bellashuvida esa belgiyalik Xorre Verstraetendan engildi ishtirokini 7-o'rinda yakunladi. SHarofiddin Lutfullaev Dyusseldordagi ishtirokidan 260 reyting ochkosini ishlab oldi. 

Ushbu vaznda tatamiga chiqqan ikkinchi vakilimiz Kemran Nurillaev esa chorak final ostonasida jahon chempioni, yaponiyalik Naoxisa Takato tomonidan to'xtatildi. Aynan Takato yakunda musobaqaning oltin medalini qo'lga kiritdi. Kemran nimchorak finalga qadar nigeriyalik Solomon Oga, moldovalik Nikolay Fokadan ustun kelgan edi. 

-66 kg vaznda ham yurtimiz sharafini ikki dzyudochimiz - Muhriddin Tilovov va Diyorbek O'razboev himoya qildi. Muhriddin Tilovov serbiyalik Straxinja Bunchich, slovakiyalik Adrian Gombok, germaniyalik Sebastyan Seydlni mag'lubiyatga uchratdi. Ammo. chorak final chiptasi uchun kechgan bellashuvda ozarbayjonlik Orxan Safarovga yutqazib qo'ydi. 

Yaqindagina vaznini o'zgartirgan Rio-2016 Olimpiadasi sovrindori Diyorbek O'razboev to'g'ridan-to'g'ri ikkinchi bosqichda bahslarga kirishdi va belaruslik Dmitriy SHershandan ustun keldi. Lekin uchinchi davrada bolgariyalik Bojidar Temelkovga imkoniyatni boy berib, musobaqadagi ishtirokini yakunladi.

Afsuski, -52 kg vaznda tatamiga chiqqan o'smirlar o'rtasida jahon chempioni Diyora Keldiyorova ham muvaffaqiyatsizlikka uchradi. Diyora ilk davra bellashuvida yoshlar o'rtasida jahon chempioni, Dyusseldorf turnirining o'tgan yilgi kumush medali sohibasi mo'g'ulistonlik Sosorbaram Lxagvasurendan engildi.