Dzyudo. Muzaffar To'raboev - jahon chempioni!

Bugun, 11 oktyabr kuni ikki nafar hamyurtimiz medallar uchun kurash olib bordi. Erkaklar o'rtasida -100 kg vazn toifasida Muzaffarbek To'raboev, ayollar o'rtasida esa -78 kg vaznli Irisxon Qurbonboeva yurtimiz sharafini himoya qildi. 

Quvonarlisi, -100 kg vazn toifasida Muzaffarbek To'raboev barcha raqiblarini mag'lubiyatga uchratgan holda, oltin medalga sazovor bo'ldi. 

Bu O'zbekiston uchun mazkur JCHdagi ikkinchi oltin bo'ldi. Kecha, Davlat Bobonov -90 kg vaznda oltin medalni qo'lga kiritib, shohsupaning eng yuqori pog'onasiga ko'tarilgandi. 

Sportchilarimizning ishtirokiga oid yangiliklarni ushbu sahifa orqali onlayn ravishda kuzatib borishingiz mumkin bo'ldi.

To'raboev finalda kanadalik Kayl Reyesga qarshi kurashdi va Golden Score'da g'alabaga erishdi! OLTIN MEDAL! TO'RABOEV - JAHON CHEMPIONI!

Muzaffarbekning kanadalik raqibga qarshi finali boshlanishiga oz qolmoqda!

Endi To'raboev finalda kanadalik Kayl Reyesga qarshi kurashadi. Mazkur bahs taxminan 17:40 dan so'ng boshlanadi. 

Muzaffar To'raboev yarim finalda niderlandiyalik Maykl Korrelni IPPON evaziga mag'lubiyatga uchratdi va finalga yo'l oldi!

To'raboev yarim finalda niderlandiyalik Maykl Korrelga qarshi kurashadi. Mazkur bahs taxminan 14:30 dan so'ng boshlanadi.

To'raboev kanadalik raqibini IPPON evaziga mag'lub etdi va yarim finalga chiqdi.

To'raboevning navbatdagi raqibi kanadalik SHadi Elanas bo'ladi. Ushbu bahs taxminan 13:50 dan so'ng boshlanadi.

-100 kg vaznli hamyurtimiz Muzaffarbek To'raboev uchinchi bosqichda gruziyalik Varlam Lipartelianiga qarshi kurashdi va ikkita vazari evaziga g'alaba qozondi. CHorak final!

-78 kg vazn toifasida hamyurtimiz Irisxon Qurbonboeva JCHdagi ilk jangini polshalik raqibasiga qarshi o'tkazdi va Golden Score'da yutqazdi. 

JCHdagi ishtirokini ikkinchi bosqichdan boshlagan -100 kg vaznli Muzaffarbek To'raboev amerikalik raqibidan ustun keldi va keyingi davraga yo'l oldi. 

Dzyudochilarimiz JCHni quyidagi raqiblarga qarshi boshlashadi: 

-78 kg: Irisxon Qurbonboeva - Bita Pasut-Klojko (Polsha)

-100 kg: Muzaffarbek To'raboev - L.A. Smit (AQSH)