Dzyudo qaytmoqda, xalqaro restart musobaqasi malum

Unga ko'ra, 23-25 oktyabr kunlariga belgilangan Budapesht "Katta Dubulg'a" turniri bilan IJF taqvimidan o'rin olgan musobaqalar boshlanadi. Keyingi musobaqa - Tokio "Katta Dubulg'a" turniri bo'lib, 11-13 dekabr kunlariga mo'ljallangan. Hozircha rasman tasdiqlangan va elon qilingan uchinchi turnir bu Qatar "Masters" musobaqasi bo'lib, 2021 yilning 8-10 yanvar kunlari Doha shahrida o'tkaziladi. Har uchchala musobaqa ham Tokio Olimpiadasiga muhim reyting ochkolarini berishi bilan ahamiyatli hisoblanadi. 

IJF prezidenti Marius Vizer bu haqida o'z fikrini bildirdi:

"Bosqichma-bosqich biz faoliyatimizni tiklab boramiz. Bugungi dunyodagi pandemik vaziyat har bir mintaqa va davlatda turlicha. SHuni inobatga olgan holda musobaqalarni nisbatan xavfsizroq mamlakatlarda o'tkazishni lozim topdik. Birinchilardan bo'lib Vengriya musobaqani o'tkazishga tayyorligini bildirdi. Oktyabr oyining so'nggi o'n kunligida biz Budapeshtda "Katta Dubulg'a" turnirini o'tkazamiz. Sportchilar, murabbiylar va hakamlarning salomatligi hamda xavfsizligini taminlash uchun barcha say-harakatlar amalga oshiriladi. Hukumat bunga kafolat ham berdi. Biz tomonimizdan bunga javobgar maxsus ishchi guruh ham tuziladi. Ha, juda qiyin davrni boshdan o'tkazyapmiz. Lekin unutmang, biz birgalikda kuchmiz!".