Dzyudochilarimiz Abu-Dabi turnirining uchinchi kungi bahslarini boshlashdi

Bugun nufuzli musobaqaning uchinchi kunida O'zbekiston terma jamoasining olti nafar azosi tatamiga chiqadi. Umuman olganda, bugun erkaklar -90, -100, +100 kg, ayollar esa -78 hamda +78 kg vazn toifalarida turnir medallari hamda Tokio-2020 Olimpiadasining muhim reyting ochkolari uchun bellashishadi. 

-90 kg vazn toifasida yurtimiz sharafini himoya qilayotgan Davlat Bobonov ilk davrada Jahon kubogi sohibi, shu yili o'tkazilgan Monreal Gran-prisi g'olibi slovakiyalik Milan Rendlni mag'lub etishni uddaladi. Uning ikkinchi bosqichdagi raqibi qirg'izistonlik Erlan SHerov bo'ladi. 

-100 kg vazndagi dzyudochimiz Muhammadkarim Xurramov esa yoshlar o'rtasida jahon chempioni, o'tgan yigi Abu-Dabi "Katta Dubulg'a" turniri bronza, Budapesht Gran-prisining kumush medallari sohibi, germaniyalik Karl-Rixard Freydan ustun keldi. Hurramov ikkinchi davrada gollandiyalik Mikael Korrelga qarshi tatamiga chiqadi. 

Afsuski, ushbu vazn toifasidagi ikkinchi vakilimiz SHerali Jo'raev ilk bellashuvida rossiyalik kuchli raqib, shu yili Minsk shahrida o'tkazilgan Evropa O'yinlari g'olibi, Ekaterinburgda o'tgan "Katta Dubulg'a" turniri chempioni, o'tgan yilgi Antaliya Gran-prisining kumush medali sovrindori Arman Adamyanga yutqazib qo'ydi. 

Malumot uchun, Abu-Dabi turniri g'oliblari o'z hisoblariga 1000 reyting ochkosini qo'shib qo'yishadi. Kumush medal sohiblari 700, bronza medal egalari esa 500 reyting ochkosiga ega bo'lishadi.