Dzyudochilarimiz Evropa Ochiq kubogida kuchli to'rtlikdan joy olishdi

European Judo Cup Orenburg 2019 musobaqasida Evropa, Osiyo va Afrika qitalarining jami 24 ta davlatidan ko'zga ko'ringan dzyudochilar tatamiga chiqishdi. 

Ushbu nufuzli musobaqada O'zbekiston terma jamoasining 7 nafar azosi ham o'z imkoniyatini namoyish etdi. Orenburg tatamilarida Doston Ro'ziev (-60 kg), Muso Sobirov, SHoxruh Yusupov (ikkisi ham -81 kg), Erbol Rustamov, Alisher Yusupov (ikkisi ham +100 kg), Kimyo Marasulova (-48 kg) hamda Nodira Yo'ldosheva (-78 kg) yurtimiz sharafini himoya qilishdi. 

Quvonarlisi, ulardan ikki nafari yakunda shoxsupaga ko'tirildi. +100 kg vazn toifasidagi polvonimiz Alisher Yusupov barcha raqiblarini mag'lubiyatga uchratib, oltin medalni qo'lga kiritdi. Alisher rossiyalik Aleksandr Dzucev, slovakiyalik Vito Dragich, yana bir mezbon sportchi Aleksandr SHalimov hamda final bellashuvida tatami egasi Alan Digurovni mag'lubiyatga uchratdi.

Ushbu vazn toifasida bellashgan yana bir hamyurtimiz Erbol Rustamov esa bronza medali uchun kechgan bahsda rossiyalik Aleksandr Pershinga imkoniyatni boy berib qo'ydi. 

Terma jamoamizga ikkinchi medalni Muso Sobirov taqdim etdi. -81 kg vazn toifasida tatamiga chiqqan Muso bronza medali uchun kechgan bahsda rossiyalik Sergey Skorobogatovdan ustun ekanligini amalda isbotladi. 

SHu tariqa, O'zbekiston terma jamoasi 24 davlat orasida umumjamoa hisobida 1 tadan oltin va bronza medali bilan 4-o'rinni egalladi. O'nta oltin, 8 ta kumush, 14 ta bronza medalini qo'lga kiritgan Rossiya terma jamoasi katta farq bilan birinchi bo'ldi. Kuchli uchlikdan Belarus va Franciya terma jamoalari joy olishdi.