“Ekobog'”da ommaviy sport-sog'lomlashtirish tadbiri o'tkazildi FOTOGALEREYA

“O'zbekistonda sog'lom turmush tarzini keng targ'ib qilish va aholini jismoniy tarbiya va ommaviy sportga jalb etish to'g'risida”gi O'zbekiston Respublikasi Vazirlar Mahkamasining 2019 yil 29 yanvardagi 65-sonli qarori bilan aholi o'rtasida sog'lom turmush tarzini keng targ'ib qilishni tizimli yo'lga qo'yish, jamiyatda sog'lom turmush tarzi tamoyillarini yanada kuchaytirish, o'sib kelayotgan yosh avlodni zararli odatlardan asrash hamda har bir mahalla, talim muassasalari, mehnat jamoalari va boshqalarda jismoniy tarbiya va sport faoliyatini samarali tashkil etish vazifasi belgilab qo'yilgan.

Tadbirda vazirlikning apparat xodimlari, shuningdek, tizimdagi barcha Respublika tashkilotlari xodimlari o'z oimla azolari bilan ishtirok etishdi.

Dastavval tadbir ishtirokchilari tetiklashtiruvchi badantarbiya mashqlariga jalb etildi. So'ngra vazirlik tizimidagi tashkilotlarning xodimlari o'rtasida kross yugurish musobaqasi tashkil etildi. Unda erkaklar, ayollar, bolalar hamda faxriylar guruh-guruh bo'lib musobaqalashdi. Bu jarayonda barcha faol bo'lishgani tahsinga loyiq.

So'ngra tadbir ishtirokchilari, Jismoniy tarbiya va sport vazirligi xodimlari va ularning oila azolari ishtirokida “Otam, onam va men – sportchilar oilasi” sport musobaqalari tashkil etildi. Ayniqsa tadbir doirasidagi arqon tortish, tosh ko'tarish, kuch sinashish (armrestling) musobaqalari barchada birdek qiziqish uyg'otdi.

Xullas, ertalabdan boshlangan ommaviy sport-sog'lomlashtirish tadbirlari tushgacha davom etdi. Unda g'olib chiqqanlar tabiiyki tashkilotchilar tomonidan esdalik sovg'alari bilan taqdirlandi. Biroq, “Ekobog'”da o'tkazilgan tadbirdan hech kim yutqazmadi. Negaki bunday ommaviy sport-sog'lomlashtirish tadbirlari yoshu keksani sportga oshno tutinishiga, sog'lom turmush tarzini hayoti mazmuniga aylanishiga xizmat qiladi.