Elena Isinbaeva O'zbekistonga keladi

O'zbek sporti tarixida ilk marotaba xalqaro ayollar kuniga bag'ishlangan katta sport bayrami - "Nafosat-2019" ayollar spartakiadasi bo'lib o'tadi. Musobaqa Milliy olimpiya qo'mitasi hamda O'zbekiston xotin-qizlar qo'mitasi hamkorligida, ayollar orasida sport va jismoniy tarbiyani ommalashtirish, sog'lom turmush tarzini targ'ib qilish maqsadida tashkil etiladi.

Ayni paytda Respublikamiz bo'ylab musobaqaning saralash bahslari davom etmoqda. Bellashuvlar sportning gandbol, voleybol, basketbol, badminton, stol tennisi va velosport turlari bo'yicha o'tkaziladi. Rejaga ko'ra, 1-2 mart kunlari poytaxtimizda final bahslari bo'lib o'tadi. Musobaqa g'olib va sovrindorlari diplom, medal va esdalik sovg'alari bilan taqdirlanishadi. “Nafosat-2019” spartakiadasining taqdirlash va tantanali yopilish marosimi esa 3 mart kuni "O'zbekiston" sport majmuasida bo'lib o'tadi.

Tantanali yopilish marosimi yuqori saviyada tashkil qilinishi kutilmoqda. Tadbirga engil atletikaning langarcho'p bilan sakrash yo'nalishida ikki karra Olimpiya o'yinlari chempioni (2004, 2008), uch karra jahon chempioni, yopiq inshootlardagi jahon chempionatining to'rt karra g'olibasi, Evropa chempioni, 28 marotaba jahon rekordini o'rnatgan afsonaviy Elena Isinbaeva tashrif buyuradi. SHu kuni muxlislar o'zbek estradasining yorqin yulduzlari ishtirokidagi koncert dasturiga ham guvoh bo'lishlari mumkin.