Elmurat Tasmuradovning principial raqibi, Olimpiada chempioni koronavirusdan forig' bo'ldi

Kubalik chempion shu yilning mart oyi boshida Kanadaning Ottava shahrida o'tkazilgan Panamerika chempionatida ishtirok etgan va yakunda -67 kg vazn toifasida musobaqa g'olibiga aylangandi. 

CHempionat yakunlanganidan so'ng Kuba terma jamoasi Ottavada qolib, bir haftadan keyin Kanadaning aynan shu shahrida start oladigan Panamerika kvalifikacion turniriga tayyorgarlik ko'rgan. Borero o'tgan yili Nur-Sultan shahridagi jahon chempionatida Tokio-2020 licenziyasini qo'lga kiritgani bois bu musobaqada ishtirok etmagandi. 

Kubalik kurashchilar 17 mart kuni Kanadadan Ozodlik oroliga qaytishgan va shundan so'ng Ismaelda infekciya simptomlari aniqlangan edi. 28 mart kuni esa uning koronavirusga topshirgan tahlili ijobiy natija bergandi. 

"Gabana" radiosining xabar berishicha, Borrero va fizioterapevt Milena Rodriges Gavanadagi Pedro Kouri Tropik tibbiyot institutida davolanib, koronavirusdan forig' bo'lishgan. Ularning har ikkisi ham izolyaciya davrini yakunladilar. Tez orada Borreroning mashg'ulotlarga qaytishi aytilmoqda.

Eslatib o'tamiz, Ismael Borero Rio-2016 Olimpiadasining yarim finalida hamyurtimiz Elmurat Tasmuradovni mag'lubiyatga uchratib, finalga yo'l olgan edi. Elmurat esa keyinchalik bronza medali uchun kechgan bellashuvda g'alaba qozonib, sovrindorlar safidan joy olgandi.