Erkin kurashchilarimiz Kiev turniriga yo'l olishdi

Olimjon Hikmatov, Abdurauf Bozorboev, Latif Xalimov, Arsen Ahmedov murabbiyligidagi kurashchilarimiz Anqarada ikki hafta davomida kuniga ikki mahaldan mashg'ulot o'tkazishdi. Ushbu yig'in Ukrainaning Kiev shahrida o'tkaziladigan xalqaro turnirga tayyorgarlik vazifasini o'tab berdi. 

Kecha kechqurun terma jamoamiz delegaciyasi Islom Karimov nomidagi Toshkent xalqaro aeroportidan Kiev shahriga jo'nab ketdi. Erkin kurashchilarimiz ertaga Ukraina poytaxtida start oladigan xalqaro xotira turnirida yurtimiz sharafini himoya qilishadi. Bugun o'z tarixida yigirma to'rtinchi marotaba tashkil etilayotgan va yigirmadan ziyod davlat kurashchilari qatnashadigan xalqaro xotira turniriga qura tashlash marosimi o'tkaziladi. 

Etiborga molik jihati shundaki, -57 kg vazn toifasida to'rt nafar kurashchimiz gilamga chiqadi. Bu haqida avval ham bir necha bor takidlaganmiz, aynan -57 kg vazn toifasida ichki raqobat juda ham kuchli. To'rt nafar kurashchimiz ham Olimpiada saralash musobaqasiga haqli. Kiev gilamlari ayni paytda kim kuchliroq ekanini ko'rsatadi.  

Terma jamoamiz tarkibi:

-57 kg: Mahmud SHavkatov, G'ulomjon Abdullaev, Nodirjon Safarov, Umidjon Jalolov

-65 kg: Ilyas Bekbulatov

-74 kg: Ixtiyor Navro'zov, Mirzo Hayitov

-79 kg: Bekzod Abdurahmonov

-86 kg: Javrail SHapiev

-97 kg: Magomed Ibragimov

125 kg: Maqsud Veysalov