Erkin kurashchimiz SHerzod Poyonov jahon chempionati finalida, Rustambekov bronza uchun kurashadi

Dunyo birinchiligining erkin kurash bo'yicha ikkinchi kungi bahslarida terma jamoamizning ikki nafar vakili medallar yo'lida kurashga kirishdi. Ikki karra Osiyo chempioni SHerzod Poyonov uchun kun omadli yakunlandi. 92 kg vazn toifasida yurtimiz sharafini himoya qilayotgan kurashchimiz final yo'llanmasini qo'lga kiritdi. 

Poyonov ilk davrada greciyalik Grigorios Saridisni 12-1, 1/8 finalda yaponiyalik Sorato Kanazavani 16-6, 1/4 finalda kanadalik Singh Grevalni 10-3, 1/2 finalda esa rossiyalik Gadjimurad Gadjibatirovni 4-1 (tushe) hisobida mag'lubiyatga uchratdi. Bugun u jahon chempionligi uchun qozog'istonlik Kamil Kuruglievga qarshi gilamga chiqadi. Bu ikki qardosh kurashchi o'tgan yilgi Osiyo chempionati finalida o'zaro to'qnash kelishgan va o'shanda Poyonov raqibini 4-2 hiobida dog'da qoldirgandi. Medallar uchun final blok bellashuvlari bizning vaqt bilan soat 20:00da boshlanadi.  

-65 kg vazn toifasidagi kurashchimiz Sanjarbek Rustambekovda ham jahon chempionatining bronza medalini qo'lga kiritish imkoniyati bor. U o'tish bosqichida armanistonlik Arman Musikyanga qarshi bahs olib boradi. Rustambekov kecha 1/4 finalda Reyji Uchidaga yutqazib qo'ygandi. Yaponiyalik kurashchi finalga yo'l olgani bois, Sanjarbekda bronza uchun imkoniyat yuzaga keldi.