Fabio Uordlining ilk chempionlik himoya jangi qachon o'tkazilishi aytildi

"Agar qarasangiz, uning hikoyasi Zolushkaning hikoyasiga o'xshaydi, hech qanday havaskor tajribasi yo'q va u endi jahon chempioni, - dedi Uorren Sky Sports’ga bergan intervyusida Uordli haqida. - Bunga u mashaqqatli mehnat evaziga erishdi, Parvardigor uni yorlaqasin, omadini bersin. Uni ilk chempionlik himoyasi kutmoqda va tabiiyki, raqib kuchli o'ntalikdan bo'lishi kerak. Umid qilamanki, biz bu jangni erta bahorda amalga oshiramiz".

"U kuchli yigitlardan biri bilan uchrashadi. Bu uning uchun katta jang bo'ladi. Fabio faqat shunday janglarni xohlaydi. U hech qachon hech kimdan qochmagan. Katta janglar - bu uning istagi!", - deya qo'shimcha qildi Uorren.

Ehtimoliy raqiblar orasida sobiq jahon chempioni va reytingning beshinchi raqamli bokschisi Daniel Dyubua, shuningdek, reytingning yuqorisida borayotgan Filip Xrgovich va Derek CHisora bor. Ammo reytingning birinchi raqamli bokschisi Mozes Itaumaga qarshi jang o'tkazilishi dargumon.

"Agar WBO jangni belgilasa, u o'tkazilmasligi mumkin, - deb tan oldi Uorren. - Ularning murabbiyi bir va bu ayni paytda biz intilayotgan narsa emas".

SHuningdek, sobiq jahon chempionlari Entoni Joshua va Tayson Fyuri ham Uordliga qarshi jangda chempionlik unvonini qaytarib olishni istaydi.

"Ehtimol, ular buni xohlashar, - dedi Uorren. - Joshua buni xohlaydimi-yo'qmi, bilmayman, lekin men uning Jeyk Pol bilan emas, Fabio bilan jang o'tkazishini afzal ko'rardim. Lekin Joshua bunday qilmaydi".