Frensis Ngannu WBC reytingida Top-10`ga kiritiladi

Bunday xulosaga kamerunlik aralash yakkakurash ustasining amaldagi WBC chempioni Tayson Fyuriga qarshi o'tkazgan jangidan keyin kelingan. Bu haqda WBC prezidenti Maurisio Suleymanning so'zlariga tayangan holda Ngannuning murabbiyi Dyui Kuper xabar berdi.

"WBC prezidenti Maurisio Suleyman Frensisni reytingning Top-10`taligiga kiritishini aytdi. Uning aytishicha, Ngannu reytingning kuchli o'ntaligida borayotgan ayrim bokschilardan kuchliroq ekan. Buni u Fyuriga qarshi jangda isbotladi", - dedi Kuper.

Eslatib o'tamiz, shanba oqshomida Saudiya Arabistonining Ar-Riyod shahrida o'tkazilgan boks oqshomida Fyuri hakamlarning ayri qarori bilan g'alaba qozongan edi. Uchinchi raundda Ngannu "Lo'lilar qiroli"ni nokdaun holatiga ham tushirib qo'ygandi. Ko'pchilik ushbu jangda hakamlarning qaroridan norozi bo'lgan edi.