Fyodor CHudinov: "Akam uchun qasos olaman"

Oqshomning markaziy jangida ikkinchi o'rta vazn toifasida sobiq WBC Silver kamari sohibi Azizbek Abdug'ofurov (13-1,5 KO) rossiyalik tajribali bokschi, sobiq jahon chempioni, hozirda ikkinchi o'rta vaznda WBA Gold kamari sohibi bo'lib turgan Fyodor CHudinovga qarshi ringga ko'tariladi. Ushbu jang 10 raund etib belgilangan.  

Kecha bokschilar matbuot anjumanida ishtirok etishdi va jurnalistlarni qiziqtirgan barcha savollarga javob berishdi. 34 yoshli CHudinov (25-2-1,17 KO) Abdug'ofurovdan akasining mag'lubiyati uchun revansh olish istagida ekanini malum qildi.

"Vaziyat taqozosi bilan jangim uch marta qoldirildi. SHuncha marta vazn haydashga to'g'ri keldi.  Ha, bu asab buzarlikdan hech kim kafolatlanmagan. Hozir o'zimni juda yaxshi xis qilyapman. Murabbiyim bilan birga raqibim ishtirokidagi janglar, xususan Pavel Silyaginga qarshi o'tkazgan so'nggi bahsini ko'rib, tahlil qilib chiqdik. Jangga zarur taktika va strategiyani ishlab chiqdik. 

Azizbek — tezkor va shu bilan birga nostandart bokschi. Uning asosiy quroli — bu tezlik! Avvalgi janglarimdagi taktikani bu safar o'zgartiraman. Ilk raunddan birinchi raqam ostida harakat qilaman. Odatda to'rtinchi yoki beshinchi raunddan boshlar edim. Ungacha kuzatuv bo'lardi. Akam 2018 yil Abdug'ofurovga yutqazib qo'ygandi. Meni hamon o'sha mag'lubiyat qiynaydi. Qasos olish uchun borimni beraman. Buning uchun sovuqqon bo'lishim kerak", — dedi 34 yoshli CHudinov.