Gimnastika IBO'SMda Ochiq eshiklar kuni tashkil etildi

O'zbekiston Respublikasi Prezidentining 2020 yil 30 oktyabrdagi «Sog'lom turmush tarzini keng tatbiq etish va ommaviy sportni yanada rivojlantirish chora-tadbirlari to'g'risida»gi Farmoni ijrosini taminlash hamda o'quvchi yoshlarni sportga qiziqtirish, o'sib kelayotgan yosh avlod qalbida vatanparvarlik, ona Vatanga sadoqat tuyg'ularini shakllantirish, o'quvchi-yoshlar orasida sportning badiiy gimnastika turini keng targ'ib qilish maqsadida Buxoro viloyati Gimnastika bo'yicha ixtisoslashtirilgan bolalar-o'smirlar sport maktabida «Ochiq eshiklar kuni» tadbirlari tashkil etib kelinmoqda.

Bugun ham ana shunday tadbirlardan biri tashkil etildi. Unda Buxoro shahar 21-sonli umumtalim maktabining 50dan ortiq o'quvchi yoshlari uchun sport maktabi shug'ullanuvchilari tomonidan ko'rgazmali chiqishlar namoyish etildi.

Tadbirning ikkinchi qismida bolalar-o'smirlar sport maktabi treneri, xalqaro toifadagi sport ustasi Darya Svechnikova hamda yosh badiiy gimnastikachilar o'quvchilarni qiziqtirgan savollarga javob berishdi.

Tadbir so'ngida 21-sonli umumtalim maktabi rahbariyati Buxoro viloyati Gimnastika bo'yicha IBO'SM trenerlari hamda shug'ullanuvchilariga minnatdorlik bildirdi.