Hasanboy Do'smatov: "Maqsadlarim orasida eng kattasi - Parij Olimpiadasi!"

Ushbu oqshomga bir qator taniqli bokschilarimiz ham tashrif buyurishdi. Olimpiya o'yinlari chempioni Hasanboy Do'smatov saytimiz muxbiri bilan suhbatda bir qator savollarga javob berdi. 

- Osiyo chempionatida oldimga qo'yilgan asosiy maqsad Saken Bibosinovdan revansh olish edi. Sababi, jahon chempionatida hakamlarning qarori adolatsiz bo'lgandi. Bunga ishonganlar ham, ishonmaganlar ham bo'ldi. Bu safar esa hakamlarga ham orqamizdan "gapirganlar"ga ham hech qanday imkoniyat qoldirmadim. 

- Havaskor boksda revansh olishingiz kerak bo'lgan boshqa bokschi qolmadimi?

- Amit bor. U bilan hisob-kitobimiz 2:2. To'g'risi, Osiyo chempionatida uni kutgandim. CHempionatga kelganida yaxshi bo'lardi. CHunki hozirgi sport formam kundan-kunga tiklanib boryapti. Umid qilamanki, kelasi yilning may oyida bo'ladigan jahon chempionatiga boradi. U bilan jang qilish niyatim bor. Bu gaplarim unga etib boradi deb o'ylayman. Sababi, uning ham muxlislari ko'p. 

- To'lqin Qilichev sizning Parij Olimpiadasida qatnashishingiz haqida gapirdi...

- Albatta, hozir maqsadlarim orasida eng kattasi aynan - Parij Olimpiadasi. Rio Olimpiadasidan so'ng prof boksga o'tib ketishim ham mumkin edi. Ammo ikkinchi Olimpiadamda ham yutishni o'zimga maqsad qilib qo'yganman. Buning uchun imkoniyat bor. Hozir vaznim ham to'g'ri keladi. Tokio Olimpiadasida ishtirok etmaganimga aynan vaznim to'sqinlik qilgandi. 

- Prof boksdagi faoliyatingizni to'xtatib turasizmi?

- Professional boksdagi faoliyatim ham davom etadi. Bir yilda ikkita jang o'tkazish ehtimolim bor. 11 dekabrda Dubayda jang qilishim mumkin edi. Hozirda menga raqib izlashyapti. Agar raqib topiladigan bo'lsa, jang qilishim mumkin. Ayni paytda esa 7 dekabrda boshlanadigan O'zbekiston chempionatiga tayyorgarlikni davom ettiryapman. 

Yana ikki yil sport formamni ushlab turolishimga ishonaman", - deya suhbatni yakunladi Do'stmatov.