Hasanboy Do'smatov Meksikada ringga chiqishi mumkin

Biz charm qo'lqop ustamiz bilan bog'lanib, rejalari haqida so'radik. 

"Aka-uka Diaslar qo'l ostida mashg'ulotlarni davom ettiryapman. SHahram va Isroil bilan birga shug'ullanyapmiz. Lekin hozircha jangim sanasi, manzili va raqibim yuz foizga aniq emas. Menejerlar bu bo'yicha ish olib borishyapti. Tez kunda tasdiqlanishi kerak. Katta ehtimol bilan Meksikada jang o'tkazsam kerak. 

Ko'pchilik kutayotgandek, Bivol - Kanelo oqshomida jang qilmayman. Bu boks oqshomining kardi allaqachon to'lib bo'lgan. Vaznimni o'zgartirganim yo'q - 49 kiloda ringga chiqaman", - dedi Do'smatov. 

Eslatib o'tamiz, Hasanboy Do'smatov o'tgan yilning dekabr oyida Toshkentda o'tgan professional boks oqshomida Xose Rivas (18-13-4, 10KO)ga qarshi ringga ko'tarilgan va raqibini muddatidan avval mag'lubiyatga uchratgandi. Do'smatov prof ringda 4 ta jang o'tkazib, barchasini muddatidan oldin g'alaba bilan yakunlagan.