Hasanboy Do'smatov ukasining O'zbekiston chempionatidan chetlatilishi haqida gapirdi

Hasanboy Do'smatov saytimizga bergan intervyusida ukasining chetlatilishi haqida fikr bildirdi:  

"Mana shu O'zbekiston chempionatida ukam bilan bitta vaznda qatnashdim va ikkimiz ham finalga etib keldik. Ukam yarim finalda boksda taqiqlangan zarbani bergan ekan. Buni o'zim ko'rmagandim. Keyinroq bildim. Bu erda ikki bokschida ham ayb bor. Ukamni raqibi birinchi orqadan zarba bergan, Faryozbek esa bunga javob qaytargan. 

Nima deymiz, bu safar chempion bo'lolmagan bo'lsa, keyingi musobaqalarda g'olib bo'ladi. U endi 18 yosh. Eng asosiysi, chempionat davomida u raqiblarini yutdi. SHu tarafdan, keyingi musobaqalarda o'zini ko'rsatadi deb o'ylayman.

Ukamni bu qaror chiqmasidan avval "so'kkandim". Nimaga bunday qilding, mana shu kerakmidi senga, kerak bo'lsa, seni ringdan chiqarvorishi ham mumkin edi, deb aytgandim. Aytganimdek, 2-3 kundan keyin mana shu qaror chiqdi. CHetlatish haqidagi qaror chiqqanidan so'ng ukam bilan hali ko'rishmadim. Unga qattiq turganim bois, u mendan qochib yuribdi", - dedi Hasanboy Do'smatov.