Hasanboy Do'smatov: "Vaznimda Saken Bibosinovga o'xshagan raqiblarni yuta oladigan bokschi chiqqanida, men ularga yo'l ochib berardim"

-51 kg vazn toifasida O'zbekiston chempioniga aylangan Rio Olimpiadasi g'olibi Hasanboy Do'smatov tashkilotchilik, Toshkentda o'tadigan jahon chempionatidagi ishtiroki va prof boksdagi faoliyati haqida gapirdi. 

- O'zbekiston chempionati yuqori saviyada tashkil etildi. Buni albatta, jahon chempionatiga tayyorgarlik bosqichi deyish mumkin. Tashkilotchilik zo'r bo'lgani uchun o'zimiz ham mazza qilib jang o'tkazdik. Bizning ko'p bokschilarimiz katta musobaqalarda bu kabi darajadagi yuqori tashkilotchilikdagi ringlarda jang o'tkazmagan. Mamlakat birinchiligi mana shunday ruhda o'tayotgani yosh bokschilarimiz uchun foyda bo'lyapti. Sababi ular jahon va Osiyo chempionatida ishtirok etishganida, birinchi janglaridanoq hayajonlanmasdan ringga chiqadi. SHu tomonlama foyda bo'lyapti, deb o'ylayman. 

 - Bu musobaqa orqali jahon chempioatida ishtirok etish uchun munosib ekanligingizni yana bir bor isbotladingiz...

- Juda ko'pchilik uni yoshi o'tdi, boshqa bokschilarni ham ko'raylik deb gapirishadi. Men har doim aytaman, Saken Bibosinovga o'xshagan, nomdor raqiblarni yuta oladigan bokschilar chiqsin, bu nafaqat ukam, balki boshqa bokschi bo'lsa ham, yo'lni bo'shatib bergan bo'lardim. Men bunaqa narsalardan o'tganman, Olimpiada chempioniman, menga yangilik emas. Lekin meni maqsadim ikki karra Olimpiada va jahon chempioi bo'lish. 

- CHempionat davomida sizga qiyinchilik tug'dirgan jang bo'ldimi?

- Yo'q, unaqa jang bo'lmadi. CHunki Osiyo chempionatidagi sport formamni ushlab turibman.  

- Jahon chempionatiga tayyorgarlik qanday olib boriladi? 

- Jahon chempionatiga yangi yildan keyin 3 ta bosqichda tayyorgarlik olib boriladi. Bundan tashqari xalqaro turnirlar ham bor. "Stranja" turniri, shuningdek, o'zimizda ham xalqaro musobaqa o'tkazilishi rejalashtirilyapti. Hali tarkib aniq emas, shuningdek, o'zimni ishtirokim ham. Baribir oldinda yana bitta ko'rik bor. 

- Vazningizda sizga raqobatchi bokschilar deb kimlarni aytgan bo'lardingiz?

- Vaznimda menga raqobatdosh bokschilardan Saken Bibosinov, yaponiyalik bokschi va Olimpiadada 2-o'rinni qo'lga kiritgan filippinlik bokschi bor. U Oiyo chempionatida - 54 kg vaznda Osiyo chempioni bo'ldi. Balki u ham Toshkentga -51 kg vaznda kelishi mumkin. CHunki Olimpiya o'yinlarida vazn toifalari qisqargan va -54 kg vazn yo'q. SHuning uchun, filippinlik bokschi jahon chempionatida meni vaznimda ishtirok etishi mumkin. 

- Prof boksdagi faoliyatingizda yangilik bormi?

- Proffesional boksda ham yangilik bor. Yaqin orada jang o'tkazishim kerak. CHunki prof boksda jang o'tkazmaganimga 6-7 oy bo'ldi. Men jang qilishga tayyorman. Menejerimga yilni oxirigacha bitta jang berishini aytdim. Hozir ular raqib izlashyapti. Agar raqib rozilik bo'lsa, yil oxirigacha bitta jang o'tkazishim mumkin.