Iga Svyontek - uch karra "Rolan Garros" g'olibasi!

Polshalik tennis malikasi Franciya Ochiq chempionatining hal qiluvchi final uchrashuvida turnir kashfiyotiga aylangan va WTA reytingida 43-o'rinni egallab turgan chexiyalik Karolina Muxovani qiyinchilik bilan mag'lubiyatga uchratdi - 6/2, 5/7, 6/4.

Iga tennischilarning o'zaro uchrashuvlaridagi muvozanatni tikladi - 1:1. Ikki soatu 48 daqiqa davom etgan final bahsida Svyontek 1, Muxova 6 ta eys zarbani amalga oshirgan. Qo'shxatolar har ikki tennischida ham 3 tadan bo'ldi. Breyklar 7 ga 5, Svyontek foydasiga. 

22 yoshli Iga Cvyontek to'rt karra "Katta Dubulg'a" turniri g'olibasiga aylandi. Uning hisobida 3 ta "Rolan Garros" (2020, 2022, 2023) va 1 ta US Open (2022) turniri bosh sovrini bor. U 2000 reyting ochkosi va 2,300,000 evro mukofot pulini qo'lga kiritdi. Muxova esa ikki haftalik mehnatidan 1300 ochko va 1,150,000 evro ishlab oldi.