Ikki yosh toifasidagi O'zbekiston chempionati bilan yangi mavsum boshlanadi

12-19 yanvar kunlari poytaxtimizdagi "Universal" sport majmuasida yoshlar hamda o'smirlar o'rtasidagi O'zbekiston chempionati bo'lib o'tadi. Dastlab 12-15 yanvar kunlari 2003-2004 yillarda tavallud topgan yoshlar, keyin esa 16-19 yanvar kunlari oralig'ida 2006-2007 yillarda tug'ilgan o'smirlar mamlakat chempionligi uchun bahslarga kirishadilar. 

Dekabr oyida Qoraqalpog'iston Respublikasi, barcha viloyatlar hamda Toshkent shahrida O'zbekiston chempionatiga saralash vazifasini o'tab bergan musobaqalar o'tkazildi va jamoalar shakllantirildi.

Mamlakat birinchiligida o'z vazn toifasida g'olib va sovrindor bo'lganlar o'smirlar hamda yoshlar terma jamoalari safini to'ldiradi. Tabiiyki, ular shu yil hisobidan o'tkaziladigan Osiyo va jahon chempionatlarida yurtimiz sharafini himoya qilish imkoniyatiga ega bo'ladilar.