Ikki yunon-rum kurashchimizda bronza, bugun yana medallar kutyapmiz

O'z tarixida 24-marotaba tashkil etilayotgan musobaqaning ikkinchi kungi bahslarida ikki yunon-rum kurashchimiz bronza medalini qo'lga kiritdi. -55 kg vazn toifasidagi kurashchimiz Ilhom Bahromov bronza medali uchun kechgan bellashuvda ukrainalik Vyacheslav Bayraktarni 8:0 hisobida dog'da qoldirdi. Yunon-rum kurashchilarimizga ikkinchi bronza medalini Tokio Olimpiadasi licenzianti Jalgasbay Berdimuratov taqdim etdi. U belaruslik Yaroslav Kursdan 8:0 hisobida ustun keldi. 

Bugun o'tkaziladigan uchinchi kungi final bosqich bahslarida yana bir necha yunon-rum kurashchimiz musobaqaning bronza medali uchun gilamga chiqadi. Yarim finalda eronlik raqibi Ali Rizo Nejatiga 6:9 hisobida yutqazib qo'ygan Islom Bahromov bugun bronza medali uchun bahsga kirishadi. Uning raqibi o'tish bellashuvidagi Ukraina va Armaniston kurashchilari bahsidan so'ng malum bo'ladi.

-67 kg vazn toifasida yurtimiz sharafini himoya qilayotgan uch kurashchimizda musobaqaning bronza medallarini qo'lga kiritish imkoniyati yuzaga kelgan. Aram Vardanyan va Mahmud Baxshulloev bronza medali uchun kechadigan bellashuvdagi raqiblarini kutishyapti. Aramning raqibi aynan Mirzobek Rahmatov bo'lishi mumkin. Buning uchun u o'tish baxsida ukrainalik Miroshnikni mag'lub etishi lozim.  

130 kg vazndagi polvonimiz, Osiyo o'yinlari g'olibi Mo'minjon Abdullaev ham bugun bronza medali uchun gilamga chiqadi. Uning raqibi Bolgariya yoki gruziyalik kurashchi bo'ladi. Tokio Olimpiadasi yo'llanmasini qo'lga kiritib ulgurgan Rustam Assakalov bronza medali yo'lidagi o'tish bahsida ishtirok etadi.