Insayder o'zbekistonlik bokschilarga oid muhim yangiliklar bilan o'rtoqlashdi

"Bokschilar menejeri Alik Frolov SHahram G'iyosov, Bahodir Jalolov hamda bir qator yosh sportchilar borasida so'nggi malumotlarni berdi.

SHahram G'iyosov Rolli Romero bilan chempionlik jangini kutmoqda. WBA va PBC (Premier Boxing Championship) o'rtasidagi muzokaralar ancha vaqtdan beri davom etmoqda. Agar kelishuvga erishilmasa, yaqin orada jang uchun moliyaviy tender elon qilinishi kutilmoqda.

Otabek Xolmatov tez orada ringga qaytadi. U bilan rasmiy menejment shartnomasi bo'lmasa-da, Joel Dias murabbiy sifatida yordam bermoqda. Frolov uning ajoyib jangchi ekanini takidladi va tez orada yangiliklar bo'lishini aytdi.

Javohir Ummataliev va Asadxo'ja Mo'ydinxo'jaev borasida. Ularning ikkinchi professional janglari allaqachon rejalashtirilgan va tez orada elon qilinadi. Javohirni tez ko'tarish rejalashtirilmagan — u yiliga 4-5 ta jang va havaskor turnirlar orqali bosqichma-bosqich rivojlantiriladi.

Bahodir Jalolov. Ikki karra Olimpiya chempioni uchun aniq va puxta reja bor. Agar hammasi reja bo'yicha ketsa, Bahodir bu yil juda kuchli va qulay poziciyada bo'ladi", deyiladi xabarda.