Intervyu. Aleksandr Kim: "Taekvondochilarimiz iyun oyida uchta nufuzli xalqaro musobaqada ishtirok etishadi"

- Aleksandr Anatolevich, dastlab Toshkentdagi yig'in haqida malumot bersangiz... 

- 4 apreldan Toshkentda navbatdagi yig'inni boshladik. Barcha sportchilar sog'-salomat va mashg'ulotlarda qatnashishmoqda. 15 apreldan ushbu yig'in xalqaro yig'in maqomini olishi kutilmoqda. 

- Qanday qilib? 

- Sababi Toshkentga Gruziya va Xitoy Taypei taekvondo terma jamoalari kelishi rejalashtirilgan. Agar kelishuv amalga oshsa, Toshkentda uchta terma jamoa birga xalqaro o'quv-mashg'ulot yig'inini o'tkazadi. 

- Mazkur yig'inda aynan qanday mashg'ulotlarga urg'u berilmoqda?

- Bu yig'inda sportchilarimizning jismoniy holatini ushlab turish maqsadida umumjismoniy tayyorgarlik va maxsus jismoniy tayyorgarlikka urg'u bermoqdamiz. Yaqinda bo'lib o'tgan xalqaro musobaqada qatnashgan taekvondochilarning kamchiliklarini bartaraf etish ishlari olib borilmoqda. 

- Taekvondochilarimiz oldida turgan navbatdagi musobaqalar qaysi? 

- Terma jamoamiz iyun oyida uchta xalqaro musobaqada ishtirok etishi kutilmoqda. Gran Pri 1-seriyasida Olimpiya reytingidagi eng kuchli 32 nafar sportchi ishtirok etadi. Ushbu musobaqa 3-5 iyun kunlari Italiyaning Rim shahrida bo'lib o'tadi. 27 iyun kuni Xitoyda Butunjahon Universiada bahslari boshlanadi. 24-27 iyun kunlari Janubiy Koreyada taekvondo bo'yicha Osiyo chempionati o'tkaziladi.

O'zbekiston taekvondo WT associaciyasi matbuot xizmati