Isroil Madrimov Czyuning bugungi mag'lubiyatiga izoh berdi

Oqshomning markaziy jangi birinchi o'rta vazn toifasida o'tkazilib, unda WBO yo'nalishi chempioni, avstraliyalik Tim Czyu (24-1, 17 KO) amerikalik davogar Sebastyan Fundora (21-1-1, 13 KO)ga ochkolar hisobiga ko'ra imkoniyatni boy berib qo'ydi. Czyu faoliyatidagi ilk mag'lubiyatini qabul qilib oldi. Fundora esa 23-jangiga kelib, ilk bor chempionlik uchun ringga chiqdi va biryo'la ikkita kamarni qo'lga kiritdi. 

Birinchi o'rta vaznda WBA chempionlik kamari Isroil Madrimovga tegishli bo'lib turibdi. Hamyurtimiz saytimizga bergan intervyusida ehtimoliy raqiblarining bugungi jangi haqida gapirdi. 

"Czyu - Fundora jangini tomosha qildim. Haqiqatan ham, Sebastyan juda ham noqulay raqib. Bo'ydor bokschilar hamisha har qanday raqibga qiyinchilik tug'dirib kelgan. Tim Czyuga ham noqulaylik olib kelishini sezib, kutib turgandim. Amalda ham shunday bo'lib chiqdi. Fundora bilan o'z vaqtida sparring-mashg'ulot o'tkazganman. Uning ikki metrlik bo'yi hamda uzun qo'llari raqiblarini qiynab qo'yadi. Har qanday raqib bilan jang qilmasin, shu ikki omil, yani bo'y va qo'lining uzunligini unga yordam bergan. Bugungi Czyuga qarshi kechgan jangda ham shu narsa muhim rol o'ynadi", - dedi Madrimov.